13 июль 1916 йил - Туркистон генерал-губернаторлигининг Жиззах уездида аҳолининг "мардикорлик"ка олиш тўғрисидаги фармонга норозиликлари билан мустамлакачилик тузумига қарши умумий қўзғолонлар бошланади.
Қўзғолон Жиззах уездининг Жиззах шаҳридан ташқари Ўзбек, Равот, Қоратош, Сангзор, Совруқ, Боғдон, Фориш, Ём, Қоратол, Чашмаоб каби волостларида ҳам бўлиб, унга Назирхўжа эшон, Абдураҳмон жевачи, Қосимхўжа эшонлар раҳбарлик қилади.
Қўзғолонни бостириш учун 14 июль Самарқанддан 90 кишилик ҳарбий бошлиқлар ротаси, Оренбург казаклари сотняси, 16 июль Тошкентдан 12 та рота, 6 тўп, 3 та казак сотнялари, сапёрлар ротасидан иборат жазо қўшинлари юборилади.
Қўзғолонни бостириш жараёнида Жиззах шаҳри ва атроф қишлоқларга ўт қўйилади, аҳолини ёппасига қириш, шаҳар-қишлоқлардан аҳолини чўлга қувиш, қўзғолончиларни намойишкорона ўлдириш ишлари амалга оширилади.
Мустамлакачилик тузумига қарши 1916 йил ҳаракатлари деярли бутун Туркистон ўлкасида бўлиб ўтади.
