Расмий Анқара Данияда Қуръон нусхаси ва Туркия байроғининг таҳқирланишини кескин қоралайди. Бу ҳақда Туркия ташқи ишлар вазирлиги баёнотида айтилади.

“31 март, Рамазон ойида муқаддас китобимиз Қуръони карим ва улуғ байроғимизга қарши яна бир нафрат жинояти содир этилганини кескин қоралаймиз”, — дейилади баёнотда.

Департамент Дания ҳукуматини ушбу нафрат жинояти айбдорларини жавобгарликка тортиш, шунингдек, келажакда бундай провокациялар такрорланмаслиги учун самарали чоралар кўришга чақирди.

ТИВ 24 март куни худди шундай воқеа Данияда содир бўлганини эслатди.

Қайд этилишича, Даниянинг Aнқарадаги элчиси Денни Aннан Туркия Ташқи ишлар вазирлигига чақирилган ва воқеа юзасидан кескин норозилик билдирилган.

Дипломатик миссия "сўз эркинлиги баҳонасида ушбу жирканч ҳаракатга рухсат бериш мутлақо қабул қилиниши мумкин эмаслиги ва бундай ёндашувни ҳеч қачон оқлаб бўлмаслиги"ни таъкидлади.

“Шубҳасиз, ҳуқуқий ва маъмурий чораларнинг етарли эмаслиги ва бундай хатти-ҳаракатларнинг олдини олиш учун сиёсий ироданинг йўқлиги, шунингдек, айбдорларнинг жазосиз қолиши кейинги провокацияларга сабаб бўлди”, — деди Туркия ТИВ.

Қайд этилишича, бу ҳаракат “сўнгги пайтларда Европада исломофобия, ксенофобия, дискриминация ва ирқчилик кучайиб бораётганининг яққол далилидир”.

“Бу турдаги нафрат жинояти ҳам бағрикенглик, тинч-тотув яшаш маданияти ва демократик қадрият тарафдорларини очиқ ҳақорат қилишдир”, — дейилади баёнотда.