Туркиянинг Анталия вилояти Манавгат туманида 28 июль куни бошланган ўрмон ёнғинига 12 яшар бола сабабчи бўлгани аниқланди. Бу ҳақда турк ОАВ хабар тарқатди.

Бола ота-онаси ажрашаётгани учун руҳияти яхши бўлмаганини, шу сабабли ўрмонга ўт қўйганини эътироф этган. У прокуратурада кўрсатма бергандан кейин болалар уйига жойлаштирилган.

Ўрмон ёнғинлари Туркиянинг бир қатор вилоятларида кузатилмоқда. 4 август ҳолатига кўра, 33 вилоятда 167 та ёнғинни бартараф этишнинг уддасидан чиқилди, 7 вилоятда ёнғинлар давом этмоқда. Турар жойлар, қишлоқ хўжалиги объектлари ёниб кетди, ҳайвонлар нобуд бўлди. Охирги маълумотларга қараганда, ёнғинлар 8 кишининг ўлимига олиб келди. Ёнғинларни ўчириш учун Туркияга бир қатор давлатлар ёрдам, хусусан, самолётлари ва ўт ўчирувчиларини юборди.