Нью-Йоркдаги олий ҳакамлар ҳайъати қароридан сўнг Дональд Трампга нисбатан эълон қилиниши кутилаётган айбловлар бўйича АҚШ собиқ президенти тақрибан тўрт йилллик қамоқ жазосига ҳукм қилиниши мумкин.
Бу ҳақда 31 март, жума куни DW га берган интервьюсида Федерал тергов бюросининг (ФТБ) собиқ махсус агенти, фирибгарлик ва молиявий жиноятларга қарши кураш бўйича мутахассис Девид Шапиро айтиб ўтди.
«Очиқ манбалардан олинган маълумотларга асосланиб, айбловлар тўпламига тил бириктириш, бизнес ҳужжатларини қалбакилаштириш, сайловолди ташвиқотини молиялаштириш тўғрисидаги маълумотларни ошкор қилишда фирибгарлик, суғурта ва солиққа оид фирибгарлик киради, деб тахмин қиламан», - дейди Шапиро. «Айни пайтда уларнинг аксарияти Трампга тўрт йиллик қамоқ жазоси билан таҳдид соладиган жиддий “Е” тоифали жиноий ҳуқуқбузарликлар билан боғлиқ », — дея тушунтирган эксперт.
Девид Шапиро суд жараёни қандай бўлиши мумкинлиги ҳақида гапирар экан, Трамп расмий айбловларни эшитиш учун судья ҳузурига келишини айтди. Унинг бармоқ излари ва полиция иш жилди учун суратга олинади. Айбловлар 4 апрел куни эълон қилиниши кутилмоқда. Тахминларга кўра, кейин АҚШ собиқ президенти қўйиб юборилади.
Адвокат Жо Такопина аввалроқ Трампнинг судга келиш вақтида қўлига кишан тақилмаслигини айтган эди. Ўз навбатида, Девид Шапиронинг фикрича, Оқ уйнинг собиқ раҳбари бунинг тескарисидан манфаатдор бўлиши мумкин.
«Бу вазиятнинг жиддийлигини, қурбонлик мақомини кучайтиради ва у 21-асрнинг хавфли жиноятчиси, мафиози деган таассурот уйғотади», деб таъкидлади эксперт. «Тасаввур қилса бўладики, унинг ошкораликка мойиллиги ва устунликка эришиши мумкин бўлган вазиятлардан максимал даражада фойдаланиш истаги туфайли у тажовузкор риторикани афзал кўриши ва «Менга худди Американинг биринчи душмани каби муносабатда бўлинг», - дейиши мумкин, дея қўшимча қилган Шапиро.
Нью-Йоркдаги катта ҳакамлар ҳайъати собиқ актриса Сторми Даниелсга жим бўлиш учун пул тўлаш ишининг бир қисми сифатида АҚШ собиқ президенти Доналд Трампга қарши жиноий иш қўзғатиш учун овоз берди. Манҳеттен округи прокурори Алвин Браггнинг 31 март куни Twitter'да эълон қилган баёнотига кўра, прокурорлар Трампнинг адвокати билан боғланиб, уни район прокуратурасига келишини мувофиқлаштирган.
Прокурор қўшимча маълумотни айблов қўйиш муддати белгиланганидан кейин беришга ваъда қилди. The New York Times газетасининг ёзишича, яқин кунларда айблов эълон қилинади. АҚШ собиқ президентига қандай айбловлар қўйилиши ҳозирча маълум қилинмаган.
Американинг CNN ва NBC телеканаллари сиёсатчининг адвокати Жо Такопинага таяниб, Трамп келаси ҳафта судга келиши мумкинлигини хабар қилмоқда. Бу АҚШ тарихида биринчи марта мамлакатнинг амалдаги ёки собиқ президентига жиноий айблов қўйилишидир.
Манҳеттен округи прокуратураси собиқ президентга 2006 йилда Трамп билан яқин муносабатда бўлганини даъво қилган актриса Сторми Даниелсга пул тўлаш схемасидаги роли бўйича тергов ўтказмоқда. 2016 йилги президентлик сайловларидан бироз олдин Даниелс келишув доирасида Трампнинг адвокатларидан 130 минг доллар олган.
