Арманистон бош вазири Никол Пашинян охирги Тоғли Қорабоғ уруши қурбонлари ҳақида маълумот берди.
«44 кунлик урушда 3773 киши ҳалок бўлди, 243 киши бедарак йўқолган», – деди у бугун парламентидаги нутқида.

Айни пайтда Пашинян Арманистоннинг Тоғли Қорабоғ бўйича «конструктив музокаралар»га тайёрлигини ва Ереван «аниқ таклифлар» кутишини маълум қилди.
«Биз ЕХҲТ Минск гуруҳи ҳамраислиги доирасидаги музокаралар жараёнининг қайта бошланишини муҳим деб ҳисоблаймиз», – дея таъкидлади Арманистон бош вазири. 

Тоғли Қорабоғдаги охирги уруш 2020 йилнинг 27 сентябрида бошланди ва 9 ноябрида Озарбайжоннинг ғалабаси билан тугади. Боку Тоғли Қорабоғнинг катта қисмини қайтариб олишга муваффақ бўлди. Томонлар Россиянинг воситачилигида 10 ноябрдан эътиборан ўт очишни тўхтатиш ҳақида келишувни имзолади.

Уруш тугаган бўлса-да, Озарбайжон ва Арманистон ўртасида зиддият ниҳоясига етгани йўқ. Тоғли Қорабоғда вақти-вақти билан тўқнашувлар кузатиляпти, ҳар икки томондан ҳам қурбонлар бўляпти. 

Никол Пашинян тилга олган ЕХҲТ Минск гуруҳи 1992 йилда Тоғли Қорабоғ можаросини ҳал қилиш учун тузилган эди. Россия, Франция ва АҚШ унинг ҳамраислари ҳисобланади. Озарбайжон ўтган вақт давомида ЕХҲТ Минск гуруҳи можарога ечим топиш учун ҳеч нарса қилмаганини айтиб келади.