Бу ҳақда Украинанинг Лондондаги элчиси Вадим Пристайко Британия парламентида қилган чиқишида маълум қилди.
Элчига кўра, Киев ва Харьков фуқароларига ватанга қайтишга шошилмаслик тавсия қилинган. Чунки ҳозир бу шаҳарлардаги вазиятни тўла хавфсиз деб бўлмайди.
БМТ маълумотига кўра, Украинани уруш бошидан бери 6,3 миллиондан зиёд одам тарк этган. Уларнинг аксарияти Польша, Руминия, Россия, Венгрия, Молдова ва Словакияга чиқиб кетган.
БМТ агентлиги Шенген ҳудудида одамлар эркин ҳаракатланаётганига эътибор қаратган. Тақдим этилган маълумотлар фақат Венгрия, Польша ва Словакия чегараларидан ўтган кишилар сонини акс эттиради, холос. Булар Украинага чегарадош мамлакат ҳисобланади. Агентлик тахминича, қочқинларнинг катта қисми кейинроқ бошқа мамлакатларга ўтиб кетишган.
