Ижтимоий тармоқларда фарзандини сотаётганда қўлга олинган оналар ҳақидаги хабарлар учраб турибди. Ҳайрон қоламан фарзанд буюм эмас-ку сотадиган. Масаланинг туб илдизи ҳақида ўйлай бошлайман. Қандай ҳолда она ўз боласини сотмоқчи бўлади? Аллоҳнинг энг бебаҳо неъматини сотишга нима мажбур қилади?
Фарзандини сотаётган бир она катта ўғлини даволатиш мақсадида шу ишга қўл урганини айтган. Бир она тишларини даволатмоқчи экан... Бу баҳона, дейман. Бир фарзанд соғлиги йўлида иккинчисидан воз кечилмайди. Ёки онага тиш масаласи фарзанд неъматидан улуғ эмас.
Ҳар қандай вазиятда, ҳар бир масалада оналар, аёллар тарафида бўлган мен бу вазиятда иккиланиб қоламан. Уларни қандай оқлайман, нима дейман?
Кўпинча бу ишни бош, эгаси йўқ аёллар қилаётганига эътибор қаратдим. Аёл-да бошида эгаси йўқ, эртага нима бўлади, деб қўрққан. Йўқ, нафс мажбур қилган. Ўйлаб кўрайлик, она фарзанди дунёга келгунча тартадиган азоблар, дунёга келтириш жараёни... Аллоҳ қалбга соладиган чексиз оналик муҳаббати... Буларни осон унутиб болани пуллаш мумкинми? Бу нафснинг инсоний туйғулардан ғолиб келиши демак. Бу Худони танимаслик демак.
Энг ачинарлиси шундай ҳолларда болага харидор топилаётгани ҳам. Фарзанд асраб олишнинг шаръий ва қонуний томонларини билмасдан, бировдан пулга бола сотиб олиш қайси мантиққа тўғри келади? Бир Худони танимаган боласини сотмоқчи бўлса, унга ёрдам бериб, жиноятига тенг шериклик дегани эмасми бу?!
Баъзан алданган, хўрланган аёллар, қизлар ҳақида эшитамиз. Боласини сотмоқчи бўлганлар ҳам шундай вазиятга тушганлардир. Баъзилари бу йўл гуноҳлигини билар, баъзилари билмас. Нима бўлганда ҳам фарзанд Аллоҳнинг неъмати. Ундан қутилиш чора эмас. Уни сотиш моддият эмас.
Барибир ҳар бир саволга Аллоҳни таниш ва танитиш жавоб бўлади.
Болаларингизни сотманг, улар Аллоҳнинг неъмати.
Манзура Шамс
