Коллектив Хавфсизлик Шартномаси Ташкилотига аъзо давлатлар бир овоздан Афғонистон билан чегарада вазият кескинлашса, Тожикистонга ёрдам беришади.
Бу ҳақда КХШТ Бош котиби Станислав Зась Мудофаа вазирлари кенгаши, Ташқи ишлар вазирлари кенгаши ва КХШТ Хавфсизлик кенгашлари котиблари қўмитасининг қўшма йиғилишидан сўнг журналистларга маълум қилган. У Афғонистондаги вазият КХШТни алоҳида ташвишга солаётганини таъкидлади.
«КХШТга аъзо барча давлатлар бир овоздан ва умумий позицияни яна бир бор тасдиқладилар. КХШТнинг жанубий чегараларида вазият кескинлашган тақдирда, Тожикистонга барча зарур ҳарбий ва дипломатик ёрдам кўрсатилади», - деган Зась.
Шунингдек, КХШТ жаҳон ҳамжамиятини афғонистонликларга гуманитар ёрдамни кенгайтиришга чақиради. «КХШТ мамлакатларининг қўшма баёнотида жаҳон ҳамжамияти афғон аҳолисига жуда муҳтож бўлган гуманитар ёрдамни кенгайтиришга чақирилади», деб таъкидлаган Зась.
