Германия Бундесвернинг (Германия Қуролли Кучлари) ўз захираларидан Украинага 19 та Леопард 2 жанговар танкини етказиб бериши мумкин, дея хабар бермоқда Der Spiegel ўз манбаларига таяниб.

Хабарга кўра, 2022 йил ёзи бошидан Германия Мудофаа вазирлиги Бундесвер ихтиёрида бўлган турли Леопард моделларининг батафсил рўйхатига эга. Шунингдек, у Украинага етказиб бериш учун қайси моделлар кўриб чиқилиши мумкинлигини кўрсатади. Der Spiegel нашри маълумотларига кўра, Бундесверда турли русумдаги жами 312 та Леопард 2 танки мавжуд. Шу билан бирга, ўтган йилнинг май ойида 99 таси таъмирланган бўлса, биттаси фойдаланишдан чиқарилган.

Агар Германия ҳукумати Киевга жанговар танклар етказиб беришга рози бўлса, Германиянинг Леопард 2А5 моделлари бошқа Европа мамлакатлари, масалан, Полшанинг Леопард 2 моделлари билан бирлаштирилиши мумкин. Нашрнинг хулосасига кўра, Бундесвер жанговар танкларининг Украинага етказилиши борасида Германия Мудофаа вазирлигининг янги раҳбари Борис Писториусга босим ўтказган.