Туркия Ички ишлар вазири Сулаймон Сойлу Греция билан чегарада совуқда музлаб ўлган 12 муҳожирнинг жасади топилганини маълум қилди.
Вазир муҳожирлар ўлимида Грецияни айблади. Унинг сўзларига кўра, грек чегарачилари 22 муҳожирга ўта шафқатсиз муносабатда бўлган ва муҳожирлардан 12 нафари совуқдан ўлган. Шунингдек, Сойлу Греция муҳожирларни Туркия ҳудудига ноқонуний равишда қайтариб юбораётганини билдирди.
Бу Туркиянинг муҳожирлар масаласида Грецияни биринчи бор айблаши эмас. Афина Анқарани муҳожирларни атайин Греция томонга йўналтиришда, Анқара эса Афинани муҳожирларга нисбатан ноинсоний муносабатда бўлишда айблаб келади.
Туркия Ички ишлар вазири Сулаймон Сойлу Европа Иттифоқининг миграция муаммосига нисбатан заиф ва ғайриинсоний муносабатини ҳам танқид остига олди.
Эслатиб ўтамиз, 2021 йилнинг ноябрь ойида Беларусь ва Польша чегарасида миграция инқирози авжига чиққанида Туркия ноқонуний муҳожирлар оқимини тўхтатиш учун кескин чоралар кўрди. Анқара Ироқ, Сурия ва Яман фуқароларининг Туркия аэропортларидан Беларусга учишини тўхтатди.
