Ливия миллий муроса ҳукуматига қарши кураш олиб бораётган генерал Халифа Ҳафтар Қурбон байрами муносабати билан табригида Туркияга таҳдид қилди. 

“Турк аскарларига марҳамат кўрсатилмайди, чунки улар бунга лойиқ эмас. Эрдоған Ливияга аждодларининг меросини қидиришга келган”, – дейилади Ҳафтарнинг ижтимоий тармоқларда тарқатилган баёнотида. 

Генералнинг иддаосига кўра, Ливияда 300 йил ҳукмронлик қилган турклар талон-тарож ва қотилликлар билан шуғулланган. У туркларнинг Ливияни “яна бир бор ишғол қилишига” йўл қўйилмаслигини таъкидлади. 

Маълумки, Ливия миллий армияси қўмондони бўлмиш Халифа Ҳафтар ўтган йилнинг апрелидан бери пойтахт Триполини қўлга киритиш мақсадида Миллий муроса ҳукумати кучларига қарши кураш олиб боряпти. Халқаро ҳамжамият томонидан тан олинган Миллий муроса ҳукумати эса генерал Ҳафтарга қаршилик кўрсатиш учун Туркиядан ҳарбий ёрдам олмоқда.