Афғонистоннинг собиқ президенти Ҳамид Карзай Sunday Times нашрига берган интервьюсида “Толибон” ҳаракатини берган ваъдаларини бажармаётганликда айблади.

«Барча музокараларнинг аввалида биз учта принципиал масалага урғу берганмиз: таълим ва қизларнинг таълим олиш ҳуқуқи, ҳукуматда инклюзивлик ҳамда аёлларнинг жамиятдаги роли. Шунингдек, биз миллий байроқ ва мамлакат қадриятларининг муҳимлиги тўғрисида ҳам гаплашганмиз, – деди Карзай. – Улар (толиблар) бизга тўлиқ қўшилган, тўғри гапларни гапирган, бироқ уларнинг бари ҳам амалда акс этаётгани йўқ. Уларнинг ваъдалари амалга ошиши зарур, акс ҳолда Афғонистон яна дунёдан узилиб қолади”.

Собиқ президент юқори синф ўқувчилари бўлган қизлар учун ўқиш ҳали бошланмаганидан таассуф билдирди. Унинг таъкидлашича, таълим бўлмай туриб Афғонистон ҳеч қачон оёққа тура олмайди. Шунингдек, Карзай муваққат ҳукуматда аёллар ва айрим этник гуруҳлар вакилларининг йўқлилига ҳам эътибор қаратди. 

Собиқ президент Ғарб давлатлари коалицияси йигирма йилдан кейин Афғонистонни тарк этганидан хурсандлигини айтди. “Улар бизнинг маданиятимизни ҳурмат қилмади”, – деди у.