Мазкур темир йўл орқали йўловчи ва юк ташиш даражаси ҳамда сифати ошиши кутилмоқда

Хитой — Қирғизистон — Ўзбекистон темир йўли қурилиши жорий йилнинг кузида бошланади. Бу ҳақда «24.kg» хабар берди.

Қирғизистон Вазирлар Маҳкамаси 2022-2026 йилларга мўлжалланган темир йўл транспортини ривожлантиришнинг асосий йўналишларини тасдиқлаган. 

«Кузда мустақиллигимиз тарихидаги энг йирик лойиҳа Хитой — Қирғизистон — Ўзбекистон йўналиши бўйича темир йўл қурилишини ишга тушириш режалаштирилган. Биз бу лойиҳани қўллаб-қувватлашимиз керак», — деган Қирғизистон Вазирлар Маҳкамаси раҳбари Оқилбек Жапаров.

Қайд этилишича, темир йўл қурилиши бутун Марказий Осиё минтақасининг транспорт ва транзит салоҳиятини оширишга хизмат қилади. Магистрал Хитой, Қирғизистон ва Ўзбекистонни Каспий денгизи портлари ва ундан кейин Европа билан, келгусида эса Трансафғон темир йўли орқали Покистон портлари билан боғлаши айтилмоқда.