Жанубий Африка Республикасида коронавирусга қарши кураш доирасида спиртли ичимликлар сотуви буткул тақиқланди, дея хабар бермоқда Би-би-си. 

Тақиқдан кўзда тутилган мақсад алкогол туфайли рўй берадиган маиший зўравонлик, йўл-транспорт ҳодисалари ва жанжалларнинг олдини олишдир. Полиция, шифокорлар ва социологларнинг айтишича, мамлакатда шошилинч тиббий ёрдам кўрсатиш ҳолатларининг 40 фоизига айнан алкогол айбдор. 

Одатда ҳар ҳафта ЖАР касалхоналарига турли жароҳатлар билан ўртача 34 минг киши мурожаат қилади, аммо март ойида карантин жорий этилганидан бери бундай ҳолатлар 75 фоизга камайди. 

“Агар алкогол тақиқи бекор қилинса, ҳар ҳафта травмотология бўлимлари тахминан 5 минг янги бемор билан тўлади”, – дейди профессор Чарльз Перри. 

Мутахассисларнинг таъкидлашича, спиртли ичимликлар иммунитетнинг сусайишига сабаб бўлади, бу эса ўз навбатида коронавирусдан зарарланиш эҳтимолининг ортишига олиб келади.