Жанубий Африка Республикасида олимлар SARS-CoV-2 коронавирусининг янги вариантини аниқлашди. Эпидемияга қарши кураш ва инновациялар маркази директори Тулио де Оливейранинг айтишича, янги вариант “жуда кўп мутацияларга эга ва бу ташвишланиш учун сабабдир”. 

Олимлар янги вариантда камида ўнта мутация мавжудлиги айтмоқда. Таққослаш учун: дельта вариантида иккита, бета вариантида эса учта мутация бор.

Коронавируснинг янги варианти шартли равишда B.1.1.529 деб номланди. У ҳозиргача Ботсвана ва Гонконгга саёҳат қилган жанубий африкаликларда аниқланди. 

ЖАР Соғлиқни сақлаш вазири Жо Паахла В.1.1.529 варианти мамлакатда сўнгги кунларда касалланишлар сонининг ортига олиб келаётганини маълум қилди. 

Жаҳон Соғлиқни Сақлаш Ташкилоти бугун ЖАРда коронавируснинг янги варианти аниқлангани муносабати билан фавқулодда йиғилиш ўтказади. 

Айни пайтда Буюк Британия коронавинуснинг янги варианти туфайли Африканинг олти давлатига парвозларни вақтинча тўхтатди. Гап Ботсвана, Зимбабве, Лесото, Намибия, Эсватини ва ЖАР ҳақида бормоқда.