Эрон ташқи сиёсати бўйича стратегик кенгаш раиси Камол Харрозий минтақа давлатларини мулоқотга чақирди.

Харрозий Эрон Олий раҳнамоси Оятуллоҳ Али Ҳоманаийнинг катта маслаҳатчиси ҳисобланади. У минтақадаги сиёсий келишмовчиликлар ва хавфсизлик муаммоларини ҳал қилиш мақсадида Эрон, Саудия Арабистони, Туркия, Миср  ва Қатар ўртасида мулоқот ўрнатиш муҳимлигини таъкидлаган.

Дипломат Қатар томонидан бу бўйича муҳим таклифлар берилганини ва Теҳроннинг унда иштирок этишга тайёрлигини билдирган.

Харрозий Эрон ядро дастури ҳақида гапирар экан, унинг мамлакати ядро қуроли яратиш бўйича барча техник имкониятларга эгалигини, бироқ бу бўйича якуний қарорга келмаганини маълум қилган.

Ўтган ойда Қатарда АҚШ ва Эрон икки кунлик музокаралар ўтказди. Улар 2015 йилда имзоланган ядро келишувини қайта тиклаш масаласини кўриб чиққан.

Шу билан бирга Теҳрон 16 июль куни 61 нафар америкалик, жумладан, собиқ давлат котиби Майк Помпеога қарши санкциялар жорий этган.