Канада парламенти чоршанба куни Хитойнинг Шинжон вилоятидаги 10 минг мусулмон уйғур қочқинни икки йил ичида Канадага жойлаштириш бўйича мажбурий бўлмаган таклифни бир овоздан маъқуллади.
Жамоалар палатаси либерал депутат Самир Зуберининг қонун лойиҳасини ёқлаб, 322-0 овоз билан овоз берди. Таклифда шунингдек, ҳукуматни учинчи мамлакатларга қочиб кетган уйғурлар ва бошқа этник туркий мусулмонлар қайтиши учун Хитойнинг «босим ва қўрқитиш»ига дучор бўлаётганини тан олишга чақиради.
Қонун лойиҳасининг қабул қилиниши Бош вазир Жастин Трюдо ҳукуматини таклифга риоя қилишга мажбурламасада, бир овоздан қўллаб-қувватланиши унинг озчилик ҳукуматига чора кўришга босим ўтказиши мумкин.
Иммиграция вазири Шон Фрейзер ўз баёнотида «Канада ҳар доим ҳимояга муҳтожларга ёрдам бериш учун ўз ҳиссасини қўшади. Мен бугун Жамоалар палатаси томонидан қабул қилинган таклифда кўрсатилган чора-тадбирларни илгари суриш учун барча партиялар аъзолари билан ишлаш ниятидаман», деган.
Инсон ҳуқуқлари ташкилотлари Хитойни Шинжон ғарбидаги 10 миллионга яқин мусулмон этник озчилик бўлган уйғурларга нисбатан кенг кўламли зўравонликларда, жумладан лагерларда мажбурий меҳнатдан оммавий фойдаланишда айбламоқда. Хитой бу даъволарни қатъиян рад этади.
2021 йили Канада уйғурлар геноцидига Хитойнинг муносабатини ошкор айтган давлатлардан бири болди. Канада ўтган йили Бирлашган Миллатлар Ташкилотида Хитойнинг Шинжондаги мусулмонларга нисбатан инсон ҳуқуқларини поймол этаётгани юзасидан мунозара ўтказишга муваффақиятсиз уринган давлатлар қаторида эди.
