Ливанда иқтисодий инқироз давом этаётган бир пайтда дори-дармон захираси тугаб бормоқда, дея хабар беради “Анадолу” агентлиги.
Дори препаратлари импортчилари ва омборхоналари касаба уюшмасидан маълум қилишларича, дори-дармон импортининг қисқаришига хорижий валютанинг йўқлиги сабаб бўлмоқда. Бунинг оқибатида сурункали касалликларга чалинганлар дориларини ололмаяпти. Касаба уюшмаси июль охирига бориб вазият янада оғирлашишидан огоҳлантирди.
Айни пайтга келиб дори-дармон импорт қилувчиларнинг ишлаб чиқарувчиларга қарзи 600 миллион доллардан ошган. Бироқ Марказий банкка боғлиқ муаммолар туфайли қарзни тўлашнинг иложи бўлмаяпти.
Мамлакатда иқтисодий инқироз бошлангандан бери 600 та дорихона ёпилган.
Эслатиб ўтамиз, Ливанда 1975-1990 йиллардаги фуқаролар урушидан кейинги энг оғир иқтисодий инқироз кузатилмоқда.
