Россиянинг Украинага кенг кўламли ҳарбий босқинининг 361-кунида рус қўшинлари қўшни давлатнинг босиб олинган аҳоли пунктларини назорат остида сақлашга ҳаракат қилишда давом этмоқда. Украинанинг қуролли кучлари ва ҳудудий мудофаа бўлинмалари агрессияга қаршилик кўрсатмоқда. Ҳар икки томон вакилларининг баёнотларини мустақил манбалардан текширишнинг иложи йўқ. БМТ маълумотларига кўра, 16 миллиондан ортиқ украиналиклар аллақачон уйларини тарк этган.
Украинанинг Россия Федерацияси билан уруш давридаги йўқотишлар реестри халқаро ташкилот шаклида тузилади, деди Украина адлия вазири Денис Малюска. Унга кўра, ташкилот Нидерландия томонидан молиялаштирилади. Реестр Гаагада жойлашади. У тузилгандан сўнг, компенсация талабларини кўриб чиқиш учун комиссия тузилади.
Туркия ҳукумати Стокголм аризасини маъқулламаса, Финляндия Швециясиз НАТОга қўшилади, деди Финляндия мудофаа вазири Микко Савола. Шу билан бирга, у иккала давлатнинг ҳам иттифоққа қўшилишини афзал кўришини таъкидлади. Финляндия ва Швеция 2022 йил май ойида Россиянинг Украинага агрессияси фонида НАТОга аъзо бўлиш учун ариза берган эди. Ҳозирги вақтда улар Туркия ва Венгриядан ташқари блокнинг барча мамлакатлари томонидан маъқулланган.
Хитойнинг Москва ва Киев ўртасидаги можарода воситачи сифатидаги роли Россия учун тўхтатувчи омил бўлиб хизмат қилиши мумкин. Бу ҳақда Украина ташқи ишлар вазири Дмитрий Кулеба маълум қилди. «Биз Хитой ва Россия ўртасидаги мавжуд муносабатларни ҳисобга олган ҳолда Россиянинг агрессив ниятларини тўхтатишда Хитой муҳим роль ўйнашига ишонамиз», — деди Кулеба.
Вашингтон Пекинни Украинага қарши урушда Россияга ёрдам бермаслик, жумладан, Ғарб жорий этган санкцияларни четлаб ўтишга ёрдам беришдан яна огоҳлантирди. Бу ҳақда АҚШ Давлат котиби Энтони Блинкен Хитой Коммунистик партияси Марказий қўмитаси Сиёсий бюроси аъзоси, ташқи сиёсатга масъул Ван Йи билан учрашувдан сўнг маълум қилди.
«Мен Хитойни Россияга моддий ёрдам кўрсатишдан огоҳлантирдим. Шунингдек, алоқа линияларини очиқ сақлаш муҳимлигини таъкидладим», - деб ёзган Блинкен твиттерда.
Франция президенти Эммануэл Макрон Украинанинг урушда ғалаба қозонишини исташини, лекин Россиянинг тор-мор этилишини истамаслигини айтди. «Мен баъзилар каби биз Россияни тўлиқ мағлубиятга учратишимиз, унинг ҳудудида унга ҳужум қилишимиз керак, деб ўйламайман. Бу кузатувчилар биринчи навбатда Россияни тор-мор қилмоқчи. Бу ҳеч қачон Франциянинг позицияси бўлмаган ва бўлмайди», деди у француз матбуотига берган интервьюсида.
Макрон, шунингдек, можаронинг ҳеч бир томони жанг майдонида катта устунликка эриша олмаслигини айтди. «Украина ўз позициясини ҳимоя қила олишини истайман, лекин охир-оқибат у ҳарбий жиҳатдан тугамаслигига ишончим комил», — деди Франция президенти.
