Куни кеча Ўзбекистон Республикаси Марказий банки томонидан 2021 йилнинг 22 декабрдан бошлаб муомалага чиқарилиши кутилаётган янги кўринишдаги номинал қиймати 50 000 бўлган банкнот шаклидаги пулда йўл қўйилган хато ҳақида мақола эълон қилган эдик.

Унга кўра, қоғоз пулда акс эттирилган мақбара ёзилганидек Абу Исо Термизий эмас, Ҳаким Термизий мақбараси эканлиги маълум бўлган. Мазкур ҳолатга эътибор қаратган Ўзбекистон Республикаси Марказий банки мазкур техгник хатолик бартараф этилишини маълум қилган.

«Миллий валютамиз дизайнига бефарқ бўлмаган фуқароларимиз томонидан 50 000 сўмлик банкнот намунасининг олд томонида «Ал-Ҳаким ат-Термизий» мақбараси тасвири туширилганлиги, аммо мақбара номи «Абу Исо ат-Термизий» деб ёзилганлиги билдирилди. Мутахассислар билан қайта ўрганиш натижасида ҳақиқатдан ҳам намунадаги тасвир ва унинг номланишида техник хатолик мавжудлиги маълум бўлди. Шу сабабли Ўзбекистон Республикаси Марказий банки янги дизайндаги 50 000 сўмлик банкнотлар муомалага чиқарилишидан олдин унинг намунасида аниқланган техник хатолик бартараф этилишини ҳамда мақбаранинг номи тўғри қайд этилишини маълум қилади», – дейилади банк хабарида.

Шунингдек, Марказий банк банкнотлар дизайнларига бефарқ бўлмаган барчага ўз миннатдорчилигини билдирган.