НАТО Бош котиби Йенс Столтенберг Афғонистонда «Толибон» ҳаракатининг ютуғига мамлакатнинг аввалги ҳукумати айбдор эканлигини айтди.

«Афғон раҳбариятининг лаёқатсизлиги бугун биз кузатаётган фожиага олиб келди», – деди Столтенберг Афғонистон бўйича сешанба куни Брюсселда ўтказилган йиғилишда. Унинг таъкидлашича, Афғонистон раҳбарияти «Толибон»га қаршилик кўрсата олмади ва низони музокаралар орқали ҳал қилолмади.

Шунингдек, Столтенберг НАТО Афғонистонда қолган ходимлари ва маҳаллий ходимлар хавфсизлигини таъминлаш устида иш олиб бораётганини маълум қилди. НАТО раҳбари Афғонистондаги ҳодисалардан сабоқ олиш кераклигини ҳам айтиб ўтди. Унинг назарида асосий масала неча йиллардан бери Ғарб томонидан қўллаб-қувватлаб келинган афғон кучларининг толибларга қатъийроқ қаршилик кўрсата олмагани билан боғлиқ.

«НАТО кучларини олиб чиқиш ҳақидаги қарор толибларнинг ҳокимиятни эгаллаб олиши эҳтимоли эътиборга олинган ҳолда қабул қилинган. Лекин уларнинг бунчалик тез уддасидан чиқиши кутилмаган ҳолат бўлди», – деди у.