Қозоғистон парламенти Сенати (юқори палатаси) депутатлари ялпи мажлисда республиканинг собиқ президенти Нурсултон Назарбоевнинг Қозоғистон Халқ Ассамблеяси ва Хавфсизлик Кенгашига умрбод раислигини бекор қилувчи қонунчиликка ўзгартиришларни маъқуллади.
Парламент Мажлиси (қуйи палатаси) аввалроқ ялпи мажлисда мазкур тузатишларни маъқуллагани ҳақида 19 январь куни депутат Қанат Нуров маълум қилган эди. Кейинроқ қонун лойиҳалари матнлари Сенат сайтида эълон қилинди.
Палатанинг Конституциявий қонунчилик, суд-ҳуқуқ ва ҳуқуқни муҳофаза қилиш органлари қўмитасининг хулосасига кўра, ўзгартиришлар Қозоғистон Халқ Ассамблеяси раиси ва Хавфсизлик кенгаши раисининг ваколатларини мамлакат президентига ўтказишга қаратилган. Шундай қилиб, Ассамблея тўғрисидаги қонун Қозоғистоннинг биринчи президенти – Элбошининг унга умрбод раҳбарлик қилиш ҳуқуқини, Хавфсизлик Кенгаши тўғрисидаги қонун эса Хавфсизлик Кенгашига умрбод раҳбарлик қилиш ҳуқуқини бекор қилади.
Бундан ташқари, парламентда Назарбоевнинг республика Конституциявий кенгаши аъзоси бўлиш, шунингдек, ҳукумат ва парламентда сўзлаш ҳуқуқини сақлаб қолган конституциявий қонунларга ўзгартириш ва қўшимчалар киритиш масаласи муҳокама қилинмоқда.
Қозоғистонни қарийб 30 йил бошқарган Назарбоев 2019 йилнинг 20 мартида президентликдан кетган, бироқ кейин Хавфсизлик кенгаши раҳбари, ҳукмрон «Нур Отан» партияси етакчиси ва Қозоғистон халқ ассамблеяси раҳбари лавозимларини сақлаб қолган эди. 2021 йил апрелида Назарбоев АНК раиси лавозимини тарк этиш ва ишларни республиканинг амалдаги раҳбарига топшириш тўғрисидаги қарорини эълон қилди. Хавфсизлик кенгаши раисининг ваколатлари Қосим-Жомарт Тоқаевга 5 январь куни, мамлакатдаги оммавий тартибсизликлар даврида берилган эди.
18 январь куни тартибсизликлар бошланганидан бери илк бор қозоғистонликларга видеомурожаат орқали кўринган 81 ёшли Назарбоев Тоқаев Қозоғистонда тўлиқ ҳокимиятга эга эканлигини ва у нафақага чиққанини айтган эди. Шу билан бирга, собиқ президент «элитадаги можаро ёки қарама-қаршилик» ҳақидаги миш-мишларни рад этган.
