Нью-Йоркда Бирлашган Миллатлар Ташкилоти Бош Ассамблеясининг 76-сессияси доирасида Туркия ва Эрон ташқи ишлар вазирлари - Мевлут Чавушўғли ва Ҳусайн Амир Абдуллоҳиён ўртасида учрашув бўлиб ўтди, деб хабар берган Эроннинг Тасним ахборот агентлиги.

Икки мамлакат ташқи ишлар вазирликлари раҳбарлари ўртасидаги мулоқот натижаларидан бири Теҳронда Эрон, Озарбайжон ва Туркия ташқи ишлар вазирларининг учрашувини ўтказиш тўғрисидаги келишув бўлган. Уч томонлама форматдаги дипломатик саммит қачон ўтказилиши аниқ айтилмаган.

Охирги кунларда Боку ва Теҳрон ўртасидаги муносабатларда кескинлик кучайган. Озарбайжон армияси 2020 йил кузида Қорабоғда бўлиб ўтган урушдан кейин Боку назорати остига ўтган Сюник вилояти (Горис-Капан автомагистрали) М-2 давлатлараро магистралининг алоҳида қисмида шу ойнинг бошида назорат-ўтказиш пунктини ўрнатди ва Эрон юк машиналаридан 260 долларлик «йўл солиғи» талаб қила бошлади. Ўтган ҳафта Озарбайжон полицияси Тоғли Қорабоғга ноқонуний юк етказиб берганликда айбланган икки эронликни ҳибсга олган.