Покистонда полиция ва собиқ бош вазир Имрон Хон тарафдорлари ўртасида тўқнашувлар давом этмоқда.
Маҳаллий матбуотнинг ёзишича, мамлакат Жиноят кодексининг бир неча моддалари билан айбланган сиёсатчини ҳибсга олиш ҳақидаги суд қарорига қарши норозилик намойишлари 14 март куни оқшомдан бери давом этмоқда.
Айрим жойларда намойишлар полиция ходимлари ва собиқ бош вазир тарафдорлари ўртасидаги тўқнашувларга айланган. Сўнгги маълумотларга кўра, 33 нафар ҳуқуқ-тартибот ходими яраланган, намойишчилар орасида ҳибсга олинганлар ҳам бор.
Собиқ бош вазирнинг Лаҳор вилоятидаги уйи полиция томонидан ўраб олинган, тартибни сақлаш учун ҳарбийлаштирилган кучлар жалб қилинган.
Адолат ҳаракати партияси раҳбари Имрон Хоннинг ўзи Twitter'да полиция намойишчиларга қарши сув пуркагичлардан фойдаланаётгани ҳақида хабар берган. Сиёсатчи полиция унинг уйига ҳам кўздан ёш оқизувчи газ сепганлигини қўшимча қилган.
Унинг фикрича, расмийлар уни ушлаб, кейин ўлдиришга ҳаракат қилмоқда.
