Қатар Туркияда 6 феврал куни содир бўлган зилзила қурбонларига 1400 та мобил уй жўнатишга тайёрланмоқда, деб хабар берди Анадолу ахборот агентлиги.

Туркиянинг Доҳадаги элчиси Мустафо Гўксу душанба куни Анадолу нашрига берган интервюсида “Бугундан бошлаб 1400 та мобил уйдан иборат янги партия олтита кемага юкланади”, деди.

“Туркия элчихонаси Қатар тараққиёт жамғармаси билан барча мобил уйларни имкон қадар тезроқ етказиб бериш учун ишламоқда”, дея қўшимча қилди у.

Қатар Туркия ва Сурияда содир бўлган кучли зилзила қурбонларига 10 минг мобил уй етказиб беришга ваъда берди.

"Тўлиқ жиҳозланган 306 та уйнинг биринчи партияси Туркияга 12 феврал куни етиб келган.

Туркияга шошилинч ёрдам етказаётган Қатар самолётлари сони ҳозирда 40 тага етди”, деди турк дипломати.

Охирги расмий маълумотларга кўра, 6 февраль куни Туркия жануби ва Сурияда содир бўлган икки кучли зилзила оқибатида камида 50 000га яқин киши ҳалок бўлган ва 105 505дан ортиқ киши жароҳатланган.