Қирғизистон КХШТ қўшинларининг ўз ҳудудидаги машғулотларини бекор қилишга қарор берди, дея хабар қилган «Озодлик» радиоси мамлакат Мудофаа вазирлиги матбуот хизматига таяниб.

КХШТнинг «Бузилмас биродарлик – 2022» қўмондонлик-штаб ўқув машғулотлари Қирғизистон ҳудудида – Иссиқкўл вилоятининг Балиқчи шаҳрида 10-14 октябрь кунлари бўлиб ўтиши керак эди. Тадбирнинг бекор қилиниши сабаби аниқланмаган.

Машғулотлар иштирокчилари Қирғизистонга 26 сентябрдан 8 октябргача КХШТ тинчликпарвар қўшинларининг «Ўзаро ҳамкорлик-2022», «Поиск-2022» ва «Эшелон-2022» машғулотлари бўлиб ўтган Қозоғистондан келиши керак эди. Энди Россия ва Беларус иштирокчилари Қозоғистон орқали ўз мамлакатларига қайтади, деб хабар берган Tengrinews.kz.

Коллектив Хавфсизлик Шартномаси Ташкилотига (ОДКБ) Арманистон, Беларус, Қозоғистон, Қирғизистон, Россия ва Тожикистон киради, КХШТ давлатларининг қўшма машғулотлари ҳар йили ўтказилади.

Озодлик радиоси 2022 йил сентябрь ойи ўрталарида Қирғизистон ва Тожикистон ҳарбийлари ўртасида кенг кўламли тўқнашув бўлиб ўтганини эслайди. Қирғизистоннинг 63 фуқароси ҳалок бўлгани маълум, Тожикистонда 41 киши ҳалок бўлган (Озоди радиоси маълумотларига кўра, Тожикистонда 74 киши ҳалок бўлган). Томонлар бир-бирини можарони қўзғатганликда айблаган. Бу тўқнашувдан сўнг Қирғизистон парламентининг айрим депутатлари Тожикистон армиясини қўшма машғулотлардан чиқариб юборишни талаб қилган.