Саудия Арабистони ҳукумати АҚШ разведкасининг журналист Жамол Қошиқчининг ўлдирилиши бўйича эълон қилган хулосаларини рад этди. Бу ҳақда Саудия Арабистонининг SPA агентлиги хабар тарқатди.
Саудия Арабистони Ташқи ишлар вазирлиги АҚШ разведкасининг хулосасини ёлғон ва ноаниқ маълумотларга таянган деб атаб, жиноятга алоқадорларни жазолаш учун аллақачон керакли чоралар кўрилганини таъкидлаган. Шунингдек, вазирлик Саудия Арабистони мамлакат раҳбарияти, суверенитети ва унинг суд тизими мустақиллигига қасд қилувчи ҳар қандай чораларни рад этишини билдирган.
Эслатиб ўтамиз, АҚШ разведкасининг ҳисоботида журналист Жамол Қошиқчининг 2018 йил октябрида Истабулда ўлдирилишида Саудия Арабистони валиаҳд шаҳзодаси Муҳаммад ибн Салмоннинг қўли борлиги, қотилликни шахсан у маъқуллагани айтилган.
