Саудия Арабистони Яманда БМТ назоратида ўт очишни тўхтатиш бўйича ташаббус билан чиқди, дея хабар бермоқда Deutsche Welle.

Риёзнинг таклифлари орасида Яман пойтахти Санодаги халқаро аэропортни очиш ва Ҳадийда портидан қамални қисман олиб ташлаш, портдан тушадиган даромадни жанубий ва шимолий бошқарувларнинг Марказий банкдаги умумий ҳисобрақамига тушириш кабилар бор. Бундан ташқари, Саудия Арабистон Яман ҳукумати ва исёнчи ҳусийлар ўртасида тўғридан-тўғри музокаралар ўтказилишини истамоқда.

Саудия Арабистони Ташқи ишлар вазири Файсал ибн Фарҳон ал-Сауд ҳусийлар маъқуллаган тақдирда режани амалга оширишга киришиш мумкинлини айтиб, Яман ҳукумати ва ҳусийларни ташаббусни қўллаб-қувватлашга чақирди.

Ҳусийларнинг расмий вакили Муҳаммад Абдулсалом Твиттердаги саҳифасида Саудия Арабистонининг таклифига муносабат билдирди. У таклифни ножиддий деб атаб, унда ҳеч қандай янги гап йўқлигини таъкидлади. Шунингдек, Муҳаммад Абдулсалом Саудия Арабистонидан Ямандаги ҳужумларини тўхтатишни талаб қилди.

Эслатиб ўтамиз, Яманда ҳукумат кучлари ва исёнчи ҳусийлар ўртасидаги қарама-қаршилик олти йилдан бери давом этяпти.