Исроилнинг Қуддусдаги Ҳудудий режалаштириш ва қурилиш қўмитаси Шарқий Қуддусда яҳудийлар учун 3557 та хонадон қуриш лойиҳасини тасдиқлади. 

Турар жойларни Шарқий Қуддуснинг иккита мавзесида барпо этиш режалаштирилмоқда. 

Исроилнинг инсон ҳуқуқлари билан шуғулланувчи “Ҳозироқ тинчлик” (Peace Now) ташкилоти баёнотида айтилишича, Қуддус ҳокимлиги ҳузуридаги қўмитанинг ушбу режани тасдиқлаши шунчаки тавсия характерида бўлиб, қўмитанинг бундай режани тасдиқлаш ваколати мавжуд эмас. 

Ташкилот аввалги баёнотларида АҚШнинг аввалги президенти Дональд Трамп даврида босиб олинган Фаластин ҳудудларида яҳудийлар учун турар жойлар икки баравар ортганини маълум қилган эди. 

Исроил Шарқий Қуддус ва Ғарбий соҳилни 1967 йилда босиб олган, бу ҳудудлардаги 250 дан ортиқ ноқонуний аҳоли пунктларида қарийб 600 минг яҳудий яшайди. 

Халқаро қонунларга кўра, босиб олинган Фаластин ҳудудларида яҳудийлар учун турар жойлар барпо этилиши мумкин эмас.