Швеция Олий суди судьяси дўкондан сосиска ва колбаса олиб чиқмоқчи бўлган. Суриштирув жараёни бошланганда, у истеъфога чиқиб кетган.

Швеция Олий судининг собиқ судьяси Рождество кунида супермаркетда ўғирлик қилгани учун жаримага тортилган. Бу ҳақда 31 март, пайшанба куни бош прокурор Пер Николс AFPга маълум қилди.

Унинг сўзларига кўра, Рождество байрамидан бир ҳафта олдин Стокгольм марказидаги озиқ-овқат дўконининг ходимлари томонидан 67 ёшли харидор қўлга олинган. Dagens Juridik нашрининг ёзишича, у бошқа нарсалар қаторида сосиска, фрикаделька, колбаса ва пишлоқни тўқилган сумкада яширишга ҳаракат қилган. Бироқ, харидор маҳсулотларни ўғирлаш ниятининг бўлмаганини айтган.

Кичик ўғирлик учун жарима 50 000 швед кронаси (4 800 евро) белгиланган. Февраль ойида унга нисбатан қўзғатилган иш ҳақида маълум бўлгач, судья истеъфога чиқди. Бунгача у ўз лавозимида 20 йилга яқин хизмат қилгани айтилади.