Швеция давлат телевидениеси SVT’нинг мухбири Даниянинг ўта ўнгчи “Stram Kurs” партияси раҳбари Расмус Палудан томонидан Қуръони карим китобини ёқиб юбориш провокациясини танқид қилгани учун ишдан бўшатилди.
SVT’нинг Ғарбий минтақаси бўйича янгиликлар директори Антон Свендсен ушбу ҳодиса бўйича тергов якунланганини ва мухбир SVT’нинг холислик тамойилини бузган, деган хулосага келганини айтди. Свендсеннинг қўшимча қилишича, мухбир ҳозирча ўз лавозимидан четлатилган.
26 феврал куни Швециянинг кўпгина мусулмонлар яшайдиган Гётебург шаҳрида Расмус Палудан Қуръони карим китобини ёқиб юборди ва Ислом дини ва пайғамбаримиз алайҳиссалом ҳақида ҳақоратомуз сўзлар айтди. Бу провокацияга қарши чиққан SVT мухбири ҳам Палуданга "Уйга қайт, аҳмоқ!" деган сўзлар билан муносабат билдирди.
Палудан Швеция парламентига номзод
Буни қарангки, Швеция Сайлов кенгаши сентябр ойида бўлиб ўтадиган умумий сайловларда Палуданнинг парламентга номзодлик аризасини қабул қилди.
Дания ва Швеция фуқаролигига эга бўлган Палудан 2017 йилдан бери Даниянинг турли шаҳарларида Қуръони карим китобининг ёқиш бўйича провакация қўзғатиб келган.
Ўтган йили Рамазон ойида ҳам Палудан мусулмон маҳаллалари ва масжидлар яқинида полиция ҳимояси остида провокациялар уюштирди. Палудан Пасха байрамларида Швециянинг пойтахти Стокголм ва Мальмё, Норрчёпинг ва Йончёпинг шаҳарларида ҳам провокацион ҳаракатларини давом эттирди.
Палуданнинг бу манфур ишини тўхтатилишини истаган намойишчилар йўлларда шиналарни ёқиб, полицияга ҳам тошлар билан ҳужум қилган. Бўлиб ўтган воқеалар чоғида 26 полиция ходими ва 14 намойишчи яраланган, 20 полиция машинаси ёқиб юборилган.
