Эрон Ташқи ишлар вазири Ҳусайн Амир Абдуллоҳиан Ироқ Бош вазири Мустафо Козимий ва Ироқ Ташқи ишлар вазири Фуад Ҳусайн билан учрашди. Бу ҳақда Эрон ташқи ишлар вазирлиги матбуот хизмати хабар берди.

Икки давлат ўртасидаги муносабатларни ривожлантириш юзасидан фикр алмашилди. 

Абдуллоҳиян Ироқнинг минтақавий мулоқотни ривожлантириш, жумладан, Эрон ва Саудия Арабистони ўртасида алоқаларни йўлга қўйиш масаласидаги саъй-ҳаракатларини олқишлади. 

Дипломатия раҳбари Эрон ва Саудия Арабистони элчихоналари фаолиятини икки мамлакат пойтахтларида ўзаро асосда қайта тиклаш ғоясини қўллаб-қувватлади. 

Эрон Ташқи ишлар вазири, шунингдек, Теҳрон ва Қоҳира ўртасидаги алоқаларни минтақа ва ислом дунёси манфаатлари йўлида мустаҳкамлашга чақирди. 

Абдуллоҳиян Ямандаги вазиятга ҳам тўхталиб, бу мамлакатдаги гуманитар инқирозга барҳам бериш муҳимлигини қайд этди. 

Козимий, ўз навбатида, Эроннинг минтақадаги ўрни, шунингдек, бу давлат позициясининг Бағдодга яқинлигини таъкидлади.