Афғонистон “Толибон” ҳаракати Афғонистон ҳудудида ИШИД террорчи гуруҳига қарши курашда АҚШ билан ҳамкорлик қилишдан бош тортди.

Associated Press агентлиги 9 сентябрь куни “Толибон” матбуот котиби Суҳайл Шоҳин шу мазмунда баёнот берганини хабар қилган.

Унинг таъкидлашича, ҳаракат экстремистик гуруҳларга қарши курашда «Вашингтон билан ҳамкорлик қилмайди», чунки унинг ўзи бу муаммони ҳал қилишга қодир.

“Толибон”нинг юқори мартабали амалдорлари ва АҚШ расмийлари яқин кунларда Қатар пойтахти Доҳада учрашиши керак.

Ҳар икки томон расмийларининг айтишича, экстремистик гуруҳларни жиловлаш, чет эл фуқаролари ва мамлакатни тарк этмоқчи бўлган афғонларни эвакуация қилиш масалалари муҳокама қилинади.

ИШИД яқинда содир бўлган кўплаб ҳужумлар, шу жумладан, 8 октябрь куни Қундуз шаҳридаги масжидда содир этилган террорчилик ҳужуми учун жавобгарликни ўз зиммасига олган. Ҳужум оқибатида 46 нафар шиа мусулмонлари ҳалок бўлган, ўнлаб одамлар яраланган. Портлаш улар масжидда намоз ўқиётган пайтда содир бўлган.

ИШИД террорчилари 2014 йилда Афғонистон шарқига келганидан буён мамлакат шиаларига қарши шафқатсиз ҳужумлар уюштирган.