«Толибон» тузган ҳукуматда аввалги ҳукумат аъзолари бўлмайди. TOLOnews телеканалининг хабар беришича, бу ҳақда “Толибон” ҳукуматидаги бош вазир ўринбосари Абдулғани Бародар маълум қилди. 

Унинг айтишича, Афғонистоннинг амалдаги ҳукумати таркибига киритилиши ва шу тариқа ҳукумат коалицион бўлиши учун АҚШ “Толибон”га олдинги ҳукуматда ишлаган айрим мулозимларининг исмларини берган. 

Бародар собиқ ҳукумат амалдорларини коррупцияда айблаб, ҳатто улардан айримларининг ҳозирги ҳукумат таркибига қўшилиши Ислом Амирлигининг яхлитлигига зарар етказишини таъкидлади.

«Бу одамлар ҳукуматда биз билан бирга бўла олмайди, чунки уларнинг бештаси бўлса ҳам, ҳукуматимиз обрўсига путур етказади ва биз бундай одамлар ҳукуматимизни ағдаришини истамаймиз», – деди у.

Абдулғани Бародарнинг сўзларига кўра, «Толибон» ҳукумати дунёда тан олиниш учун дастлабки шартларни бажарган. Шунингдек, у агар халқаро ҳамжамият «Толибон» ҳукуматини эътиборсиз қолдиришда давом этса, Афғонистон иқтисодий инқирозга учрашини ва инқироз қўшни давлатларга ҳам таъсир кўрсатишини айтди.