Сешанба куни эрталаб Триполига мамлакат Вакиллар палатаси томонидан тайинланган янги ҳукумат раҳбари Фатҳи Башага келганидан кейин қуролли тўқнашувлар бошланди. Бу ҳақда Al-Hadath телеканали хабар берган.

Башагага содиқ бўлинмалар ва Абдулҳамид Дбейба миллий бирлик ҳукуматини қўллаб-қувватловчи тузилмалар ўртасида турли хил қуроллар, жумладан, оғир пулемётлар қўлланилган тўқнашувлар бўлиб ўтмоқда. Дбейба ҳукуматни фақат сайланган ҳокимият раҳбарига топширишини таъкидлаб, истеъфога чиқишни рад этган. Олинган маълумотларга кўра, шаҳарнинг марказий қисмида қаттиқ  тўқнашувлар бўлиб ўтмоқда. Қурбонлар ва жароҳатлар ҳақида ҳозирча маълумот йўқ.

Сешанба куни эрталаб Ички ишлар вазири Башага тайинланган Ливия ҳукумати ўз вазифаларини бажаришини айтган. Шу билан бирга, у Ички ишлар вазирлиги Дбейба ҳукумати аъзоларини сиёсий сабабларга кўра жиноий жавобгарликка тортмаслигини қўшимча қилган.

21 апрель куни янги бош вазирнинг расмий вакили Усмон Абдулжалил ҳукумат пойтахтга кўчиб ўтишга шошилмаётганини ва у ерга фақат тинч йўл билан кўчиб ўтиш ниятида эканини айтган эди.

Ливияда парламент ва президентлик сайловлари ўтган йилнинг 24 декабрида бўлиб ўтиши керак эди, бироқ охирги лаҳзада уларни ташкил этишнинг имкони йўқлиги, жумладан, сайловлар учун шошилинч равишда ишлаб чиқилган қонунчиликдаги бўшлиқлар ва номукаммалликлар туфайли улар номаълум муддатга қолдирилган эди. 

3 март куни Ливия парламенти Тобрукда аввалги ҳукуматнинг мандати декабрь ойи охирида тугаган деб ҳисоблаб, 10 февраль куни қонунчилар томонидан янги бош вазир этиб сайланган Башага бошчилигидаги янги ўтиш даври ҳукуматига қасамёд қилди. Шу билан бирга, бундан олдин Дбейба истеъфога чиқмаслиги ва ҳокимият тизгинини фақат ўз ҳукумати умумий сайловлардан кейингина меросхўрига топшириши ҳақида бир неча бор огоҳлантирган эди.